Residensies

Ons nooi graag skrywers uit om aansoek te doen vir die volgende residensie-programme wat in 2024 by ons Paulet Huis in KwaNojoli (Somerset-Oos) aangebied word. Belangstellendes moet asseblief let op die volgende:

Neem asseblief kennis van die sluitingsdatums vir die onderskeie residensies en die dokumente wat jou aansoek moet vergesel, soos uiteengesit op elke aansoekbladsy. Alle aansoeke en dokumente moet ons via die aanlyn inskrywingsvorms bereik. Klik op “Doen aansoek” by die program van jou keuse.

Daar is ’n verskil tussen mentorskapprogramme wat uitsluitlik op opkomende skrywers gemik is en residensies wat vir beide opkomende en gevestigde skrywers beskikbaar is.

Ons definieer ’n opkomende skrywer as iemand van enige ouderdom wat nog in die vroeë stadiums van hul skryfloopbaan in ’n spesifieke genre is en wat nog nie die nodige ondersteuning of blootstelling gehad het om grootskaalse erkenning vir hul werk in dié genre te ontvang nie.

’n Gevestigde skrywer het al twee of meer publikasies deur prominente uitgewerye gepubliseer; het al erkenning vir hul werk in ’n sekere genre ontvang of is welbekend binne daardie genre; en/of verdien ’n gedeelte van hul inkomste uit hul skryfwerk in daardie genre.

Indien jou aansoek suksesvol is, sal daar van jou verwag word om die volle duur van die residensie in KwaNojoli deur te bring. Die Jakes Gerwel Stigting dek die reis- en verblyfkostes van die suksesvolle kandidate.

Die mentorskapprogramme word in Afrikaans én Engels aangebied.

Internasionale aansoeke word verwelkom, alhoewel slegs binnelande vervoerkostes deur die Stigting gedek word.

Al die skryfprogramme sluit die volgende in:

  • Nasionale retoerkaartjies na Gqeberha (Port Elizabeth), indien nodig
  • Vervoer tussen die lughawe en Somerset-Oos
  • ’n Gerieflike, eie “room with a view”
  • Die Stigting se inwonende sjef se heerlike maaltye
  • Skoonmaakdienste
  • Onbeperkte toegang tot die internet
  • Genoeg spasie vir skryf in jou kamer, stil hoekies in die huis en die tuin
  • Geleentheid om sonder die onderbreking van beurtkrag te skryf

Bosberg-boekskryf
Brussel tot Karoo
PEN dit neer
NATi Jong Sterre
Kommadagga-slypskool
Longhope TV-skryf
Oude Leeskamer
New York Internasionale Genootskap

 

Bosberg-boekskryf

Hierdie program waarvan die naam verwys na die pragtige berg reg langs Paulet Huis word aangebied in vennootskap met NB-Uitgewers (en hul drukname Tafelberg, Human & Rousseau, Kwela, Queillerie, Lux Verbi en Pharos). Ons bied ondersteuning aan opkomende skrywers van romans of nie-fiksieboeke (byvoorbeeld memoirs).

Angela Briggs en Suzette Myburgh is bekwame en ervare boekeredakteurs wat die pad stap met die opkomende skrywers vanaf manuskripontwikkeling tot moontlike publikasie.

Die skrywers en mentors werk gedurende kwartaallikse werksessies saam in Paulet Huis aan die onderskeie manuskripte. Die skrywers werk dan op eie stoom tussen werkswinkels en inkorporeer die mentors se terugvoer. Na afloop van die jaarprogram help ons die skrywers om hulle manuskripte voor te lê aan NB-Uitgewers.

Alhoewel daar geen sluitingsdatum is vir aansoeke nie, word die finale keuse teen November van die voorafgaande jaar gemaak.

Doen aansoek

Die skrywers vir 2024

Hakkiesdraad Hartman

Hakkiesdraad Hartman (1975) kom van George op die Tuinroete, maar woon tans in Mosselbaai. Hy het sy ma op die ouderdom van 16 aan die dood afgestaan en sy visuele en uitvoerende kuns is beïnvloed deur sy swerftog deur die Oos- en Wes-Kaap. Skryf en optree is vir hom terapeuties en dit help hom om die trauma van sy verlede te verwerk. Hy wil ’n suksesvolle skrywer word en sodoende van armoede ontsnap en vir sy seun ’n beter lewe bied.

Theolla Langenhoven

Theolla Langenhoven (1982) werk tans by die Universiteit van Wes-Kaapland na jare in die staatsdiens. Sy wil haar skryfwerk gebruik om haar gemeenskapswerk, haar liefde vir administrasie en haar kennis van sielkunde en kriminologie te kombineer en lig te werp op die maatskaplike kwessies wat gemeenskappe in die gesig staar. Van haar kortverhale en artikels is in Kuier gepubliseer. Haar gedigte het in die Lekka Poems-bloemlesing verskyn en in 2023 het sy ’n gebedsboek vir tieners, Die Here kom sterk deur, gepubliseer. Sy beskou dit as ’n voorreg om in 2020 te kon deelneem aan die Kommadagga-slypskool vir kortverhaalskrywers. In 2023 het sy ’n AfriCAN Honoree Authors’ Award ontvang.

Adele Ross

Adele Ross (1984) het as kind haar skryfvaardighede begin ontwikkel toe sy vir haar ma, wat as nagverpleegster gewerk het, briewe geskryf het om te vertel hoe haar dag was en haar op hoogte te hou van alles wat sy mis. Haar passie vir vertelkuns het posgevat terwyl sy nog op skool was en gedigte en kortverhale geskryf het om die trauma van afknouery by die skool te verwerk. Dit het aanleiding gegee tot haar eerste ongepubliseerde boek. Sy het aanhou skryf en werk tans as blogskrywer vir Cape Town Insider, Beauty SA en Women24. Sy skryf ook kopie vir Britse maatskappye en reklameteks vir selfhelpboeke op Amazon.

Alfred T.M. Rossouw

Alfred T.M. Rossouw (1991) is ’n Suid-Afrikaanse skrywer en redigeerder met meer as vyf jaar se ondervinding as skrywer, redigeerder, blogger en boekresensent. Hy het al in verskeie industrieë in beide die openbare en privaat sektor gewerk, insluitend in die kunste. Hy werk tans as ’n vryskutredigeerder en -skrywer vir onder andere FunDza Literacy Trust en Geko Publishing. Hy het onder die pennaam Thato Rossouw artikels vir publikasies soos News24, Mail & Guardian, Africanah Magazine, Art State, Huffington Post en Sunday Times geskryf.


 

Brussel tot Karoo

Jakes Gerwel het sy doktorsgraad in literatuur en filosofie aan die Vrije Universiteit Brussel in België voltooi. Dit is in teen hierdie agtergrond dat die Jakes Gerwel Stigting hande neem met Passa Porta, ’n internasionale literatuurhuis in Brussel, om skrywers van verskillende kontinente in die Karoo byeen te bring.

Twee Vlaamse skrywers word jaarliks gekies om ’n residensie by Paulet Huis met twee Suid-Afrikaanse skrywers te deel. Sodoende wil ons graag kruisbestuiwing tussen die skryfkuns van skrywers uit verskillende agtergronde teweegbring en die letterkunde – hier en elders – verruim.

Daar is geen mentors betrokke nie en beide opkomende en gevestigde skrywers van alle genres is welkom om in die toekoms aansoek te doen.

Belangrike datums:

  • Aansoeke vir 2024 het reeds gesluit.
  • Aankondiging van suksesvolle kandidate: 12 Februarie 2024
  • Residensie (waarvoor kandidate reeds met inskrywing moet bevestig dat hy/sy beskikbaar is): 18 tot 30 Maart 2024

Die skrywers vir 2024

Gerda Dendooven

Gerda Dendooven (1962) is in Kortrijk, België, gebore. Sy het grafiese ontwerp aan die Royal Academy of Fine Arts in Gent studeer. Aan die begin van haar loopbaan het sy vir etlike jare toesig gehou by kinderkunsateljees in museums. Sy doseer tans Illustrasie by die LUCA School of Arts in Gent. Sy doen illustrasies vir ander skrywers, maar ook vir haar eie stories. Baie van haar verhale is as teaterstukke verwerk en sy is soms self op die verhoog. Sy skep gereeld lewendige beelde by konserte of literêre optredes. In 2020 het sy lewendige beelde vir die Brussels Filharmoniese Orkes gemaak tydens die volledige uitvoering van Peer Gynt, en saam met Mauro Pawlowski en Fikry El Azzouzi vorm sy deel van Trio El Azzouzi. In 2007 is sy namens die Belgian Reading Foundation as die eerste (en enigste) kinderkonsul aangestel. Hulle fokus op kuns, kultuur en veral letterkunde.

Nele Van den Broeck
Foto: Kaat Pype

Nele Van den Broeck (1985) is ’n teatermaker, musikant, voorsanger van die groep Nele Needs a Holiday en is die afgelope agt jaar ’n gereelde rubriekskrywer vir De Standaard. Nele het musiekproduksie aan die London College of Contemporary Music studeer. Voorheen het sy gelyktydig Drama aan die Royal Academy of Fine Arts in Gent en Duits en Spaans aan die Vrije Universiteit Brussel studeer. Sy woon in Brussel. Nele se werk handel oor temas soos sielkundige kwesbaarheid, groot drome, skreeusnaakse mislukkings en filosofiese alledaagsheid. Haar werk beeld ’n voortdurende soeke na die handleiding van die lewe uit. Sy het ’n ongewone pad geloop wat haar deur teater en musiek geneem het tot by skryf en weer terug. In 2019 is ’n bloemlesing van Nele se rubrieke, Halfvolwassen, deur Uitgeverij Horizon uitgegee. Haar debuutroman, Iemand Anders, is in 2023 gepubliseer.

Sibuyiselo Sbuja Dywili

Sibuyiselo Sbuja Dywili (2000) is ’n gepubliseerde dramaturg sowel as ’n bekroonde uitvoerende kunstenaar op die skerm en verhoog. In 2021 het hy self in sy toneelstuk Ganga Nyoko! Inzima Nyoko, uitgegee deur Junkets Press, gespeel en die Zabalaza-toneelfees se toekennings vir beste produksie en beste akteur gewen. Hy is ook genomineer vir drie Fleur du Cap-teatertoekennings, en wen die prys vir beste nuwe regisseur. In 2021 is hy deur Lara Foot van die Baxter-teater genooi om aan die Masambe Writing Residency deel te neem, waartydens hy sy tweede toneelstuk, Ngxi!, geskryf het. Hy het ’n gevorderde diploma in filmvervaardiging met hoofvakke in regie, draaiboekskryf en vervaardiging. Sbuja het die voorreg gehad om by die Baxter-teater onder leiding van David Kramer onderrig oor musiekteater te ontvang.

Shireen Mall

Shireen Mall kom uit ’n gesin van agt seuns en drie dogters, almal gebore en getoë in ’n vervalle skakelhuis in Athlone op die Kaapse Vlakte. Shireen is die enigste een wat verder studeer het en het ’n BA Hons in Engelse letterkunde aan die Universiteit van Wes-Kaapland en ’n MA in kreatiewe skryfkuns aan die Rhodes-universiteit in Grahamstad verwerf. Shireen het nog altyd ’n stille ambisie gekoester om eendag ’n groot skrywer te wees wat lank na haar dood nog erken word vir haar bydrae. Sy wens dieselfde toe vir enigeen wat dit begeer.

Charl-Pierre Naudé
Foto: Alet Pretorius

Charl-Pierre Naudé (1958) is ’n Suid-Afrikaanse digter en romansier. Hy is ook ’n opgeleide en gepubliseerde filosoof met spesifieke belangstelling in hoe ons die geskiedenis onthou en die manier waarop samelewings ontwikkel. Hy het verskeie boeke en bloemlesings agter sy naam. Hy het aan verskeie literêre feeste en residensies in Europa, Suid-Afrika en Indonesië deelgeneem, en vertalings van sy poësie het in literêre tydskrifte en bloemlesings in Nederland, België, Duitsland, Noorweë, Frankryk, Indonesië, Brittanje en die VSA verskyn. Hy is in Kokstad aan die voorheuwels van die Drakensberge gebore en het die grootste deel van sy kinder- en grootwordjare in Oos-Londen, omring deur plat bome en klein riviertjies, deurgebring. Hy het aan die universiteite van Stellenbosch en die Vrystaat studeer en woon en werk in Johannesburg.

Ayanda Xaba

Ayanda Xaba (1990) is oorspronklik van Ladysmith in KwaZulu-Natal. Haar passie vir skryf het op 10-jarige ouderdom posgevat en tydens hoërskool ontluik toe sy deel was van ’n skrywersgroep, Dancing Pencils, wat gelei het tot die publikasie van haar werk in talle bloemlesings. Sy het haar eerste roman, The EZ Gang (umSinsi Press), op 16-jarige ouderdom gepubliseer, gevolg deur vyf selfgepubliseerde hardekopieë: Ulala: The Journey of Discovery, die bekroondeThrough Her Eyes, The Maiden & The Bear, SCARRED en DAMNED; en ’n e-boek, No One’s Hero, op Amazon. Ayanda is ’n bydraer vir FunDza Literacy Trust en haar werk is ook op Reader’s Café Africa, Kalahari Review en Gamaphile en in Drum-tydskrif gepubliseer. Sy het ’n sertifikaat in kreatiewe skryfkunde van INTEC College en ’n joernalistiekdiploma van ICESA Education verwerf. Sy verbeter voortdurend haar skryfvaardighede deur werkswinkels by te woon. In Februarie 2024 was sy die koördineerder van die eerste iLembe-boekfees wat by die Luthuli-museum in KwaDukuza (Stanger) in KwaZulu-Natal plaasgevind het. Tydens die residensie gaan sy aan die derde boek in haar SCARRED-reeks, Triggered, werk.

 


 

PEN dit neer

Die doel van hierdie program is om aan skrywers (opkomend of gevestig) van alle genres die geleentheid te bied om tydelik van hulle alledaagse lewensverpligtinge te ontsnap, en onverstoord te kan werk aan ’n manuskrip. Geen mentors betrokke nie en die skrywers werk dus teen hulle eie pas. Dit is nie verpligtend nie, maar voorkeur sal gegee word aan skrywers wat ondersteuningsbriewe van voornemende uitgewers by hul aansoeke insluit.

Hierdie projek word aangebied in samewerking met PEN Afrikaans en PEN South Africa.

Aansoeke vir 2024 het reeds gesluit.

 


 

NATi Jong Sterre

In samewerking met die Suidoosterfees, Artscape en New Voices, en die ondersteuning van NATi, belê ons in die ontwikkeling van ontluikende dramaturge se talente met hierdie gedeelde projek.

Na ’n intensiewe toneelskryfprogram by Paulet Huis sal die jong dramaturge se werk onder leiding van die gewilde teatermaker, Lee-Ann van Rooi, ontwikkel sodat hulle by die Suidoosterfees van 2024 kan debuteer. Waar die Stigting al die kostes dek van die dramaturge se verblyf by Paulet Huis, dra die Suidoosterfees, met die ondersteuning van NATi, die produksiefooie om die teaterstukke op die planke te bring. Kunstekaap onderskraag die teatermakers met repetisielokale, kostuums en tegniese hulp. Die dramaturge sal ook die geleentheid kry om uittreksels uit hul stukke by die Teksmark (’n KKNK-projek) op die planke te bring. Die Teksmark sal plaasvind by die Baxter-teater in Kaapstad.

Belangrike datums:

  • Sluitingsdatum: 6 Mei 2024
  • Aankondiging van suksesvolle kandidate: 10 Junie 2024
  • Residensie (waarvoor kandidate reeds met inskrywing moet bevestig dat hy/sy beskikbaar is): 15 Julie tot 4 Augustus 2024

Doen aansoek

 


 

Kommadagga-slypskool

Die Jakes Gerwel Stigting bied, in vennootskap met Huisgenoot en LitNet, ’n mentorskapprogram aan belowende opkomende kortverhaalskrywers. Die naam van die slypskool verwys na die omgewing waar Jakes Gerwel grootgeword het.

Die skrywers sal onder leiding van ons bekwame mentors, Fourie Botha en Thabiso Mahlape, tydens die residensie skaaf aan kortverhale wat spesifiek gemik is op Huisgenoot se gesinsmark. Indien dié tydskrif na afloop van die kursus ’n skrywer se kortverhaal goedkeur, sal die skrywer daarvoor vergoed word.

LitNet bied verdere blootstelling aan die jong skrywers en die projek en bied moontlike verdere publikasie-geleenthede.

Belangrike datums:

  • Sluitingsdatum: 7 Junie 2024
  • Aankondiging van suksesvolle kandidate: 5 Augustus 2024
  • Residensie (waarvoor kandidate reeds met inskrywing moet bevestig dat hy/sy beskikbaar is): 9 tot 29 September 2024

Doen aansoek

 


 

Longhope TV-skryf

’n Praktiese en intensiewe mentorskapsprogram waar opkomende draaiboekskrywers by verskeie gesaghebbendes in die TV-bedryf kan kers opsteek oor die fyner besonderhede van dié groeiende en kompeterende bedryf. Hierdie kursus word in samewerking met M-Net Kanale aangebied. Hierdie samewerking bied nie net vir jong skrywers die geleentheid om eerstehandse kennis op te doen by aktiewe rolspelers in die bedryf nie, maar na afloop van die kursus sal die suksesvolle kandidate ook die geleentheid kry om ’n internskap by hierdie leidende maatskappy te doen.

Belangrike datums:

  • Sluitingsdatum: 25 Maart 2024
  • Aankondiging van suksesvolle kandidate: 3 Mei 2024
  • Residensie (waarvoor kandidate reeds met inskrywing moet bevestig dat hy/sy beskikbaar is): 4 tot 17 Junie 2024

Doen aansoek

 


 

Oude Leeskamer

Die Jakes Gerwel Stigting en die Oude Leeskamer op Stellenbosch bied vanjaar ’n uitsonderlike skryfgeleentheid vir twee gelukkige skrywers wat elk vir twee weke in dié historiese Bolandse dorp kan kom inspirasie vind. Slegs aansoeke van die inwonende skrywers van die Jakes Gerwel Stigting se Paulet Huis (voormalig of tans) op KwaNojoli (Somerset-Oos) sal oorweeg word. Skrywers van alle genres sal oorweeg word. Die suksesvolle skrywer sal tuis voel in die luukse skryfkamer en toegang geniet tot die fasiliteite van die res van die elegante gerestoureerde gebou. Die gelukkige skrywer sal verder ’n interessante program in Stellenbosch aangebied word, wat spesiaal volgens die skrywer se belangstellingsvelde saamgestel sal word.

Belangrike datums:

  • Sluitingsdatums: 1 Maart 2024 & 16 Augustus 2024
  • Residensies (waarvoor kandidate reeds met inskrywing moet bevestig dat hy/sy beskikbaar is): 22 April tot 6 Mei 2024 & 11 tot 25 November 2024

Doen aansoek

 


New York Internasionale Genootskap

Die Jakes Gerwel Stigting (JGG) kondig met groot graagte hul eerste ses weke lange internasionale genootskap aan wat geskeduleer is om in die eerste termyn van 2024 in die Verenigde State van Amerika in New York plaas te vind.

Hierdie uitsonderlike geleentheid is oop slegs vir skrywers wat al voorheen aan ’n residensieprogram van die Stigting deelgeneem het. Daar sal van die suksesvolle kandidaat verwag word om meestersklasse by die Columbia Universiteit se Kunsskool asook by The New School by te woon en aan te bied. Die finale bevestiging van die genootskap sal afhang van die aanvaarding van die kandidaat deur die komitee by die Kunsskool.

Die Jakes Gerwel Stigting sal die koste van die internasionale vlugte dek, bystand verleen met die visumaansoek en verblyf in New York, met insluiting van per diems (dagtoelae). Die buigsame 6-wekelange genootskap sal binne ’n venstertydperk van middel-Januarie tot einde April 2024 gereël word. Die suksesvolle kandidaat kan oor geskikte begin- en einddatums kan onderhandel.

Daar sal van die verkose skrywer verwag word om ’n twee uur lange seminaar een maal per week by te woon, die skrywer moet beskikbaar wees vir kantoorkonsultasies vir 2 ure per week en moet geskrewe werk voorskryf en daaroor terugvoer gee. Die kursus moet leesgesentreer wees en van die perspektief van ’n praktiserende skrywer eerder as van ’n akademiese oogpunt aangebied word. Daar sal ook van die genoot verwag word om ’n Saterdag- kreatieweskryfklas by The New School aan te bied. Bywoning van sosiale geleenthede wat deur die Stigting en sy oorsese vennote gereël word, is verpligtend.

Die aansoeke vir die 2024-residensie het reeds gesluit. Chase Rhys is aangewys as die eerste ontvanger van hierdie genootskap. Klik hier vir nog inligting.

Vind meer uit oor die New Yorkse vennote deur op die skakels te klik: