Radiodramaskryfkompetisie

RSG, in samewerking met die ATKV, is verheug om die bekendstelling van die RSG Radiodramaskryfkompetisie aan te kondig.

Dit is die 28ste agtereenvolgende jaar wat die kompetisie aangebied word. Hierdie gesogte kompetisie bied ’n platform vir talentvolle skrywers om hul kreatiwiteit ten toon te stel en hul stories tot lewe te bring deur die boeiende medium van radio.

Pryse:

• Die algehele wenner sal ʼn kontantprys van R50 000 ontvang.
• Die naaswenner sal ʼn kontantprys van R25 000 ontvang.
• Die drama in die derde plek sal ʼn kontantprys van R15 000 ontvang.
• ’n Spesiale prys van R15 000 word aan die Jong Skrywer (onder 30 jaar oud) oorhandig.
• Daarbenewens sal ’n merieteprys van R10 000 toegeken word aan ’n drama wat deur die beoordelaars gekies word uit die finaliste wat nie vir die top vier posisies kwalifiseer nie.

Wenradiodramas sal nie net kontantpryse ontvang nie, maar ook die eer hê om in 2025 op RSG uitgesaai te word en ’n wye gehoor regoor die land te bereik.

Die volle spektrum van Afrikaans se variëteite kan gebruik word. Slegs een inskrywing per persoon word toegelaat. Die duur van die dramas moet tussen 40 en 50 minute wees – ’n maksimum van 45 A4-bladsye wat volgens die wedstrydreëls getik is. ’n Maksimum van sewe karakters word toegelaat. Die kompetisie sluit 30 Junie 2024.

’n Omvattende handleiding wat die kompetisiereëls en inskrywingsvorm bevat is op RSG se webwerf beskikbaar.